کراچی: (رائیٹ ناوٴ نیوز) سندھ کے سینیئر وزیر شرجیل انعام میمن نے کراچی کو وفاق کے حوالے کرنے کی تجویز پر شدید تنقید کی ہے۔ انہوں نے کہا کہ یہ تجویز وہ لوگ دے رہے ہیں جنہوں نے بھتے کے چکر میں لوگوں کو زندہ جلایا۔

شرجیل میمن نے پریس کانفرنس میں مصطفیٰ کمال کی باتوں پر ردعمل دیتے ہوئے بلدیہ فیکٹری کو بھتے کی وجہ سے آگ لگانے کا ذکر کیا اور کہا کہ 12 مئی کو انسانی جانیں ضائع ہوئیں۔ انہوں نے کہا کہ جے آئی ٹی رپورٹ کے مطابق بولٹن مارکیٹ میں آتشزدگی کے بعد کاروبار چھین لیا گیا۔

شرجیل میمن نے مصطفیٰ کمال کی پریس کانفرنس کے کلپس بھی چلائے اور کہا کہ ایم کیو ایم کے رہنماؤں کے ماضی کے بیانات سب کے سامنے ہیں۔ انہوں نے مزید کہا کہ گل پلازہ سانحہ پر سب غمزدہ ہیں اور حکومت متاثرین کے ساتھ کھڑی ہے۔

انہوں نے کہا کہ لاشوں کی شناخت اور ڈی این اے کی جانچ جاری ہے اور حکومت متاثرین کی مدد کے لیے اقدامات کر رہی ہے۔ شرجیل میمن نے کہا کہ تاجروں کے ساتھ ملاقات میں آئندہ کے لائحہ عمل پر بات ہوئی اور فائر سیفٹی اقدامات پر عمل کروانے کی یقین دہانی کرائی گئی۔