اسلام آباد: (رائیٹ ناوٴ نیوز) چیئرمین تحریک انصاف بیرسٹر گوہر نے کہا ہے کہ حکومت اگر مذاکرات چاہتی ہے تو دونوں ہاتھ ملائے، ایک ہاتھ مکا دوسرا ہاتھ ملانا قابل قبول نہیں۔ انہوں نے زور دیا کہ سیاسی جماعتوں کے درمیان بات چیت میں شرائط نہ ہوں۔

بیرسٹر گوہر نے میڈیا سے گفتگو کرتے ہوئے کہا کہ سیاسی لوگ ہمیشہ سیاسی حل تلاش کرتے ہیں اور ان کے درمیان دشمنی نہیں، بلکہ اختلافات ضرور موجود ہیں۔ ان کے بقول، مذاکرات کا اختیار محمود اچکزئی اور علامہ راجا ناصر عباس کے پاس ہے۔

انہوں نے مزید کہا کہ اختلاف رائے ہونا لازمی ہے، لیکن بات چیت خلوص کے ساتھ ہونی چاہیے۔ بانی پی ٹی آئی اور ان کی فیملی سے ملاقاتوں پر کوئی سیاست نہیں ہونی چاہیے، اور وکلا کو بانی تک رسائی دی جانی چاہیے۔

ان کا کہنا تھا کہ بانی پی ٹی آئی سے ملاقاتوں کے حوالے سے وزیر اعظم سے ملاقات محمود خان اچکزئی کے اختیار میں ہے، جبکہ پی ٹی آئی وفد نے اسپیکر قومی اسمبلی سے ملاقات کی ہے۔

بیرسٹر گوہر نے عمران خان کی آڈیو لیکس پر تبصرہ کرتے ہوئے کہا کہ انہوں نے خود کوئی آڈیو لیک نہیں سنی، لیکن بانی نے ماضی میں خدشات کا اظہار کیا تھا۔