لاہور: (رائیٹ ناوٴ نیوز) فضائی آلودگی کے عالمی پلیٹ فارم آئی کیو ائیر کے مطابق، لاہور دنیا کا سب سے آلودہ شہر قرار پایا ہے۔ بدھ کی صبح جاری اعداد و شمار کے مطابق، لاہور کا ایئر کوالٹی انڈیکس 452 ریکارڈ کیا گیا ہے۔

رپورٹ کے مطابق، پاکستان میں فضائی آلودگی ایک سنگین عوامی صحت اور ماحولیاتی بحران بن چکی ہے، خاص طور پر موسم سرما میں لاہور اور دیگر شہروں میں اسموگ کا مسئلہ بڑھ جاتا ہے۔ اس کی بڑی وجوہات میں صنعتی اخراج، گاڑیوں کا دھواں، فصلوں کی باقیات جلانا اور ہوا کی کم رفتار شامل ہیں۔

آئی کیو ایئر کے لائیو ٹریکر کے مطابق، کراچی فضائی آلودگی کی فہرست میں نویں نمبر پر ہے جہاں ایئر کوالٹی انڈیکس 179 ریکارڈ کیا گیا۔ اس سے قبل لاہور کا انڈیکس 507 تک پہنچ گیا تھا، جو خطرناک حد 301 سے کہیں زیادہ ہے۔

پلیٹ فارم نے پاکستان کے لیے فضائی آلودگی کا الرٹ جاری کیا ہے، جس میں آلودگی کی سطح کو غیر صحت بخش سے خطرناک قرار دیا گیا ہے، خاص طور پر بچوں اور بزرگوں کے لیے سنگین صحت کے خدشات ظاہر کیے گئے ہیں۔

پنجاب حکومت نے اسموگ پر قابو پانے کے لیے پانی کے چھڑکاؤ، فصلوں کی باقیات جلانے کے خلاف اقدامات کا دعویٰ کیا ہے، تاہم ان اقدامات کے باوجود لاہور میں فضائی آلودگی برقرار ہے۔