سرد موسم دل کے مریضوں کے لیے خطرناک ہوتا ہے، احتیاطی تدابیر پر عمل ضروری ہے تاکہ بلڈ پریشر، دل کے دورے اور فالج جیسے مسائل سے بچا جا سکے۔
کراچی: (رائیٹ ناوٴ نیوز) سرد موسم دل کے مریضوں کے لیے خطرناک ثابت ہو سکتا ہے، ماہرین کہتے ہیں کہ اس دوران بلڈ پریشر، دل کے دورے اور فالج جیسے مسائل کے امکانات بڑھ جاتے ہیں، لہٰذا احتیاطی تدابیر پر عمل کرنا ضروری ہے۔
ماہرین کے مطابق سرد موسم میں خون کی نالیاں سکڑ جاتی ہیں جس سے بلڈ پریشر بڑھ سکتا ہے اور دل کو خون پمپ کرنے کے لیے زیادہ محنت کرنی پڑتی ہے۔ اس کے علاوہ جسمانی سرگرمیاں کم ہو جانے سے دل پر دباؤ بڑھتا ہے۔
سردی سے بچاؤ کے لیے گرم لباس پہننا اور خوراک میں اعتدال رکھنا ضروری ہے۔ نمک اور چکنائی کا استعمال کم کریں اور سبزیوں، پھلوں اور دالوں کو ترجیح دیں۔
بلڈ پریشر اور شوگر کی باقاعدہ چیکنگ بھی اہم ہے۔ ورزش ترک نہ کریں مگر احتیاط کے ساتھ کریں۔ ہلکی پھلکی ورزش جیسے گھر میں چہل قدمی دل کے لیے فائدہ مند ہے۔
ماہرین کا کہنا ہے کہ سردیوں میں پانی کی کمی سے بچنا چاہیے کیونکہ یہ دل پر اضافی دباؤ ڈال سکتی ہے۔ ذہنی دباؤ اور نیند کے معمولات پر بھی توجہ دیں۔
خطرے کی علامات جیسے سینے میں درد یا سانس کی تنگی کو نظر انداز نہ کریں اور فوری طبی مدد حاصل کریں۔
