سان فرانسسکو: (رائیٹ ناوٴ نیوز) ایلون مسک نے ریان ایئر کے سی ای او مائیکل او لیری کو سوشل میڈیا پر طنزیہ جواب دیتے ہوئے کہا کہ ممکن ہے کہ وہ ریان ایئر خرید کر سی ای او کو برطرف کر دیں۔ یہ تنازعہ حالیہ سوشل میڈیا پلیٹ فارم ایکس پر سروس میں خلل کے بعد شروع ہوا۔

ریان ایئر نے مسک کے سوشل میڈیا پلیٹ فارم ایکس پر سروس خلل کے دوران طنزیہ انداز میں کہا تھا، ‘شاید آپ کو وائی فائی کی ضرورت ہے ایلون مسک؟’ جس پر مسک نے جواب دیا، ‘کیا میں ریان ایئر خرید کر ریان نامی شخص کو ذمہ داری سونپ دوں؟’۔

یہ تنازعہ دراصل اس وقت شدت اختیار کر گیا جب او لیری نے مسک کی سٹار لنک سروس کے ذریعے انٹرنیٹ کی تنصیب پر تبصرہ کرتے ہوئے مسک کو ‘احمق’ کہا تھا۔

او لیری نے وضاحت کی کہ ریان ایئر کے جہازوں پر سیٹلائٹ انٹرنیٹ نصب کرنے کے لیے ہر طیارے پر اینٹینا لگانا پڑے گا، جس پر سالانہ 200 سے 250 ملین ڈالر خرچ آئیں گے۔ ان کا کہنا تھا کہ مسافر اضافی فیس کے لیے تیار نہیں ہیں۔

یہ مباحثہ نہ صرف سوشل میڈیا اور ایوی ایشن کے حلقوں میں موضوع بحث بن گیا بلکہ یہ دو کاروباری رہنماؤں کے مختلف اندازِ فکر کو بھی نمایاں کرتا ہے۔