اسلام آباد: (رائیٹ ناوٴ نیوز) پاکستان نے دسمبر 2025 میں آئی ٹی شعبے میں 43 کروڑ 70 لاکھ ڈالر کی بلند ترین ماہانہ برآمدات ریکارڈ کی ہیں، جو پچھلے سال کے اسی مہینے کے مقابلے میں 26 فیصد زیادہ ہیں۔

مالی سال 2025-26 کی پہلی ششماہی (جولائی تا دسمبر) کے دوران آئی ٹی برآمدات 2 ارب 20 کروڑ ڈالر تک پہنچ گئیں، جو گزشتہ سال کے اسی عرصے کے مقابلے میں 20 فیصد زائد ہیں۔ حکومتی اعداد و شمار کے مطابق آئی ٹی شعبہ مسلسل ترقی کی راہ پر گامزن ہے۔

ٹاپ لائن ریسرچ کی رپورٹ کے مطابق دسمبر میں سالانہ اضافے کی بڑی وجہ پاکستانی آئی ٹی برآمد کنندگان کے عالمی کلائنٹس میں اضافہ ہے، خصوصاً خلیجی تعاون کونسل کے ممالک میں۔ اس رجحان نے برآمدی آمدن میں نمایاں کردار ادا کیا۔

رپورٹ کے مطابق اسٹیٹ بینک آف پاکستان نے ایکسپورٹرز کے خصوصی فارن کرنسی اکاؤنٹس میں رقم رکھنے کی حد 35 فیصد سے بڑھا کر 50 فیصد کر دی ہے، جس نے آئی ٹی کمپنیوں کے اعتماد میں اضافہ کیا ہے اور وہ رقوم پاکستان منتقل کر رہی ہیں۔

حکومت کی جانب سے بیرون ملک ایکویٹی سرمایہ کاری کی اجازت کو اہم پیش رفت قرار دیا گیا، جس سے آئی ٹی برآمد کنندگان کو اپنی آمدن واپس پاکستان لانے میں مزید حوصلہ ملا۔ پاکستان سافٹ ویئر ہاؤسز ایسوسی ایشن کے مطابق تقریباً 62 فیصد آئی ٹی کمپنیاں خصوصی فارن کرنسی اکاؤنٹس رکھتی ہیں۔ حکومت نے 2025-26 کے لیے آئی ٹی برآمدات کا ہدف 5 ارب ڈالر مقرر کیا ہے، جسے 2028-29 تک 10 ارب ڈالر تک لے جانے کا منصوبہ ہے۔