اسلام آباد: (رائیٹ ناوٴ نیوز) سابق وزیر خزانہ مفتاح اسماعیل نے کہا ہے کہ این ایف سی ایوارڈ کی تبدیلی اور وفاقی اخراجات میں کمی کی ضرورت ہے۔ انہوں نے سماء ٹی وی کے پروگرام ‘ندیم ملک لائیو’ میں گفتگو کرتے ہوئے بتایا کہ 4 ہزار ارب روپے پی ایس ڈی پی کے لیے مختص کیے گئے ہیں۔

مفتاح اسماعیل نے بیان کیا کہ ایکسپورٹرز پر 60 فیصد اور تنخواہ دار طبقے پر 40 فیصد ٹیکس عائد ہے، جبکہ مہنگی بجلی اور گیس کی وجہ سے خطے کے دیگر ممالک سے مقابلہ مشکل ہو رہا ہے۔ انہوں نے کہا کہ ہر ایم این اے کو 25 کروڑ روپے دیے گئے ہیں اور حکومت کو اپنے اخراجات کو محدود رکھنا چاہیے۔ دنیا بھر میں تیل کی قیمتیں 60 ڈالر سے نیچے ہیں جو پہلے کبھی اتنی کم نہیں ہوئیں۔

انہوں نے یہ بھی کہا کہ سنہری مواقع ہوتے ہوئے بھی برآمدات میں اضافہ نہیں ہو رہا۔ مفتاح اسماعیل نے مزید کہا کہ حکومت کو مشکل فیصلے کرنے کی ضرورت ہے جیسے ایم این ایز اور ایم پی ایز کو پیسے نہ دینا اور کچھ لوگوں کو ٹیکس مراعات دینا۔ انہوں نے بتایا کہ پاکستان میں بجلی بنگلادیش اور بھارت کے مقابلے میں کم استعمال ہوتی ہے اور 200 یونٹ تک سبسڈی دی گئی ہے۔