اسلام آباد: (رائیٹ ناوٴ نیوز) اسلام آباد ہائیکورٹ نے ایمان مزاری اور ان کے شوہر ہادی علی چٹھہ کی ایک روز کی حفاظتی ضمانت منظور کر لی ہے۔ ایڈیشنل سیشن جج نے دونوں ملزمان کو کل ہائیکورٹ میں پیشی کے ایک گھنٹے بعد ٹرائل کورٹ میں حاضر ہونے کا حکم دیا ہے۔

عدالت میں سماعت کے دوران ملزمان کے وکیل کامران مرتضیٰ نے بتایا کہ ایمان مزاری اور ہادی علی چٹھہ کی دو بار ضمانت منسوخ ہو چکی ہے اور ان کی گرفتاری کا حکم دیا گیا ہے۔ وکیل نے عدالت کو بتایا کہ ایمان مزاری کی طبیعت ناساز ہے اور جج صاحبان کو تحمل سے کام لینا چاہیے۔

جسٹس اعظم خان نے دونوں ملزمان کی ایک روز کے لیے حفاظتی ضمانت منظور کرتے ہوئے پولیس کو کل تک ان کی گرفتاری سے روک دیا ہے۔ دوسری جانب ڈسٹرکٹ اینڈ سیشن کورٹ میں متنازعہ ٹویٹ کیس کی سماعت جاری ہے، جہاں جج نے حکم دیا کہ ملزمان ہائیکورٹ میں پیش ہونے کے ایک گھنٹے بعد ان کی عدالت میں حاضر ہوں۔