واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے رضا پہلوی کی ایران میں مقبولیت اور قیادت کی صلاحیت پر سوال اٹھاتے ہوئے کہا ہے کہ وہ ابھی ان کی مکمل حمایت نہیں کر سکتے۔ ٹرمپ نے وائٹ ہاؤس میں ایک انٹرویو کے دوران کہا کہ ایران میں موجودہ حکومت کے خاتمے کا امکان ہے، لیکن کسی حتمی نتیجے پر پہنچنا قبل از وقت ہوگا۔

انہوں نے کہا کہ رضا پہلوی بظاہر اچھے انسان ہیں، مگر یہ کہنا مشکل ہے کہ انہیں ایران میں عوامی حمایت حاصل ہو سکے گی یا نہیں۔ رضا پہلوی، جو جلا وطنی کی زندگی گزار رہے ہیں، حالیہ ایرانی احتجاج میں اپوزیشن کی اہم آواز بن کر سامنے آئے ہیں۔

تاہم، ایران کی اپوزیشن مختلف گروہوں میں بٹی ہوئی ہے اور ان کی ایران میں منظم موجودگی محدود سمجھی جاتی ہے۔ ٹرمپ نے واضح کیا کہ نئی قیادت کا فیصلہ ایران کے اندر سے ہی آنا چاہیے اور اگر ایرانی عوام متبادل قیادت قبول کرتے ہیں تو امریکا کو اعتراض نہیں ہوگا۔