اسلام آباد: (رائیٹ ناوٴ نیوز) نائب وزیراعظم و وزیر خارجہ اسحاق ڈار نے قومی پیداوار بڑھانے اور معاشی نمو پر توجہ مرکوز کرنے کی حکومتی حکمت عملی کا اعلان کیا ہے۔ انہوں نے کہا کہ آئی ایم ایف کے پروگرام عموماً ترقی کے خلاف ہوتے ہیں، تاہم حکومت اب معاشی استحکام کے بعد ترقی کی طرف بڑھے گی۔

اسحاق ڈار نے پاکستان پالیسی ڈائیلاگ میں خطاب کرتے ہوئے کہا کہ بے روزگاری اور غربت بلند ترین سطح پر ہیں، جس کے لیے معاشی ترقی ضروری ہے۔ انہوں نے کہا کہ موجودہ حکومت کے اختتام تک اقتصادی ترقی پر توجہ رہے گی۔

انہوں نے مزید کہا کہ پاکستان میں آبادی کی سالانہ شرح نمو 2.6 فیصد ہے، اس لیے 2.6 فیصد سے کم معاشی ترقی منفی نمو کے مترادف ہے۔ وزیر خزانہ محمد اورنگزیب نے آبادی کی بڑھتی شرح کو چیلنج قرار دیا۔

وزیر منصوبہ بندی احسن اقبال نے 6 فیصد ترقی کا عزم ظاہر کیا، مگر اسحاق ڈار نے 2 سے 3 سال میں اس سطح کو حاصل کرنے کا عندیہ دیا۔ پالیسی ریسرچ اینڈ ایڈوائزری کونسل کے چیئرمین یونس ڈاگھا نے استحکامی پالیسیوں کے مسائل پر بات کی۔

اسحاق ڈار نے پاکستان انٹرنیشنل ایئرلائنز کی نجکاری کی تفصیلات بتاتے ہوئے کہا کہ 75 فیصد حصص 135 ارب روپے میں فروخت کیے گئے ہیں۔ انہوں نے بجلی کی تقسیم کار کمپنیوں کی نجکاری کا بھی اعلان کیا۔