ماسکو: (رائیٹ ناوٴ نیوز) روسی وزیر خارجہ سرگئی لاوروف نے کہا ہے کہ امریکا کی دھمکیوں اور ممکنہ پابندیوں کے باوجود روس ایران کے ساتھ تجارت اور تعاون جاری رکھے گا۔ انہوں نے یہ بیان ماسکو میں ایک نیوز کانفرنس کے دوران دیا۔

سرگئی لاوروف نے کہا کہ روس اور ایران کے درمیان طے پانے والے دوطرفہ معاہدوں پر عمل درآمد کیا جائے گا اور کوئی بیرونی طاقت دونوں ممالک کے تعلقات کی نوعیت تبدیل نہیں کر سکتی۔

روسی وزیر خارجہ نے کہا کہ امریکا کے حالیہ اقدامات عالمی نظام کو تقسیم کی طرف دھکیل رہے ہیں اور واشنگٹن کی ساکھ کو نقصان پہنچا رہے ہیں۔ اس طرز عمل سے امریکا خود کو غیر قابل اعتماد ظاہر کر رہا ہے۔

لاوروف نے مزید کہا کہ امریکا نے وہ اصول ترک کر دیے ہیں جن کی وہ برسوں سے وکالت کرتا رہا ہے، جس کے نتیجے میں کئی دہائیوں میں قائم کیا گیا بین الاقوامی ڈھانچہ کمزور ہو رہا ہے۔

انہوں نے کہا کہ عالمی سطح پر امریکا کی یہ اور دیگر پالیسیاں اس نظام کو توڑنے کی نشاندہی کرتی ہیں جو طویل عرصے میں ان ہی کی شمولیت سے تشکیل پایا تھا۔ ان کے بقول موجودہ عالمی نظام اور عالمگیریت کا عمل عملی طور پر ختم ہو چکا ہے۔