مشی گن: (رائیٹ ناوٴ نیوز) امریکی صدر ڈونلڈ ٹرمپ کے فورڈ فیکٹری کے دورے کے دوران ایک واقعہ پیش آیا جس نے خبروں میں جگہ بنالی۔ ٹرمپ نے امریکی صنعت اور ملازمتوں کو اجاگر کرنے کے لیے یہ دورہ کیا تھا، مگر ایک فیکٹری ورکر نے صدر کو تنقید کا نشانہ بنایا۔ جب ٹرمپ فیکٹری کے اندر سے گزر رہے تھے، تو ایک شخص نے انہیں ‘پیڈوفائل پروٹیکٹر’ کہہ کر پکارا۔ یہ تنقید جیفری ایپسٹین کیس کے پس منظر میں کی گئی تھی۔ ویڈیو میں دیکھا گیا کہ ٹرمپ نے آوازیں کسنے والے شخص کو گالی دیتے ہوئے نازیبا اشارہ کیا۔ اس واقعے کے بعد ویڈیو سوشل میڈیا پر وائرل ہو گئی۔ وائٹ ہاؤس نے اس معاملے پر ٹرمپ کے ردِعمل کا دفاع کیا، جبکہ فورڈ کمپنی نے اندرونی کارروائی کا عندیہ دیا۔