اسلام آباد: (رائیٹ ناوٴ نیوز) دسمبر 2025 میں پاکستان نے ترسیلات زر میں 16.5 فیصد اضافے کے ساتھ 3.59 ارب ڈالر کی وصولی کی لیکن برآمدات میں 20.4 فیصد کمی تشویش کا باعث رہی، جو 2.32 ارب ڈالر تک محدود رہیں۔

ایگزیکٹو کمیٹی کے سابق رکن مدثر مسعود چوہدری نے کہا کہ پاکستان میں کرنسی کی قدر زیادہ رکھنے اور کم سرمایہ کاری کی وجہ سے برآمدی صلاحیت متاثر ہو رہی ہے۔ انہوں نے زور دیا کہ ترسیلات زر کو زرمبادلہ کے ذخائر بڑھانے کے لیے استعمال کیا جانا چاہیے۔

مالی سال 2026 کے ابتدائی 6 ماہ میں تجارتی خسارہ 35 فیصد بڑھ کر 19.20 ارب ڈالر تک پہنچ گیا جبکہ برآمدات 9 فیصد کم ہوئیں۔ ٹیکسٹائل شعبہ بھی مزید دباؤ کا شکار رہا۔

مالی سال 2025 میں سمندر پار پاکستانیوں نے 38.3 ارب ڈالر وطن بھیجے جس سے زرمبادلہ کے ذخائر 21.01 ارب ڈالر تک پہنچ گئے۔

ماہرین کا کہنا ہے کہ توانائی کی بلند لاگت اور پرانی ٹیکنالوجی کی وجہ سے برآمدات میں اضافہ ممکن نہیں جب تک معیشت کو پیداوار اور برآمدات پر مبنی نہ کیا جائے۔