تہران: (رائیٹ ناوٴ نیوز) ایران میں حکومت مخالف مظاہروں کے خلاف کریک ڈاؤن میں 648 مظاہرین کے ہلاک ہونے کا دعویٰ کیا گیا ہے۔ ناروے میں قائم ایران ہیومن رائٹس تنظیم کے مطابق مواصلاتی بلیک آؤٹ کے باعث اطلاعات کی تصدیق مشکل ہو چکی ہے۔

تنظیم نے کہا ہے کہ مختلف شہروں میں مظاہرین کو منتشر کرنے کے لیے سیکیورٹی فورسز نے براہ راست فائرنگ اور گرفتاریوں کا سہارا لیا۔ ایرانی حکام سرکاری اعداد و شمار جاری نہیں کر رہے جبکہ سرکاری میڈیا ہلاکتوں کی تعداد کو کم ظاہر کر رہا ہے۔

امریکی صدر ڈونلڈ ٹرمپ نے کہا ہے کہ امریکا ایران کی صورتحال پر نظر رکھے ہوئے ہے اور اگر مظاہرین کے قتل کا سلسلہ جاری رہا تو واشنگٹن سخت اقدامات پر غور کر سکتا ہے۔

ایران کے سپریم لیڈر آیت اللہ علی خامنہ ای نے امریکی تنقید پر الزام عائد کرتے ہوئے کہا کہ واشنگٹن دھوکے اور غدار عناصر پر انحصار کر رہا ہے۔

ماہرین کا کہنا ہے کہ حالیہ احتجاج کی وجہ ایران کی کرنسی کی گراوٹ، مہنگائی اور معاشی بحران ہے۔ تجزیہ کاروں کے مطابق یہ احتجاج ایران کو درپیش سنگین چیلنجز میں سے ایک ہے۔