اسلام آباد: (رائیٹ ناوٴ نیوز) ملک کے مختلف شہروں میں آٹے کی قیمتوں میں اضافہ دیکھا گیا ہے، جس سے عوام میں تشویش پائی جاتی ہے۔ اسلام آباد میں آٹے کی قیمت میں 10 روپے فی کلو اضافہ ہوا ہے، جس سے روٹی اور نان کی قیمتوں میں بھی اضافے کا امکان ہے۔

بالاکوٹ میں فائن آٹا 6 ہزار روپے من اور ڈبل سپر آٹا 5800 سے 5880 روپے من کے درمیان فروخت ہو رہا ہے۔ عوام نے حکومت سے قیمتوں کو کنٹرول کرنے کا مطالبہ کیا ہے۔ پشاور میں آٹے کی قیمتیں برقرار ہیں، جہاں مکس آٹے کا 20 کلو تھیلا 2900 روپے میں دستیاب ہے، جبکہ فائن آٹے کا تھیلا 3000 روپے میں فروخت ہو رہا ہے۔

ملتان میں آٹا مزید مہنگا ہو چکا ہے، جہاں فی کلو قیمت میں 20 روپے تک اضافہ دیکھا گیا ہے، اور اب ایک کلو آٹا 130 روپے میں دستیاب ہے۔ تلہ گنگ میں بھی آٹا عام شہری کی پہنچ سے باہر ہوگیا ہے، جہاں قیمت 120 سے 130 روپے فی کلو تک جا پہنچی ہے۔

قصور میں بھی گندم اور آٹے کی قیمتیں بڑھ چکی ہیں، مقامی مارکیٹ میں فائن آٹا 120 روپے فی کلو میں فروخت ہو رہا ہے جبکہ چکی آٹا 140 سے 145 روپے فی کلو تک جا پہنچا ہے۔ چمن میں گذشتہ ایک ہفتے کے دوران آٹے کی سو کلو بوری کی قیمت میں 2500 روپے کا اضافہ ہوا ہے، جس کی وجہ پنجاب سے آٹے کی ترسیل میں رکاوٹ ہے۔