تہران: (رائیٹ ناوٴ نیوز) ایران میں جاری بد امنی کے دوران 114 سکیورٹی اہلکار ہلاک ہو گئے ہیں۔ ایرانی نیوز ایجنسی تسنیم نے 11 جنوری تک کی تازہ فہرست جاری کی ہے جس میں صوبہ بہ صوبہ ہلاکتوں کی تفصیلات دی گئی ہیں۔

رپورٹ کے مطابق ہلاک ہونے والوں میں پولیس، پاسدارانِ انقلاب اسلامی (آئی آر جی سی) اور بسیج کے اہلکار شامل ہیں۔ اصفہان میں سب سے زیادہ 30 ہلاکتیں رپورٹ ہوئیں جبکہ قزوین میں نو، اور کئی دیگر صوبوں میں ایک سے آٹھ ہلاکتیں درج کی گئی ہیں۔ تہران میں ہلاکتوں کی تعداد غیر متعین بتائی گئی ہے۔

ایرانی نیوز ایجنسی نے تشدد کو مسلح دہشت گردوں اور غیر ملکی حمایت یافتہ گروہوں کا کام قرار دیا ہے، اور امریکہ، اسرائیل اور اپوزیشن تنظیموں پر ایران کو غیر مستحکم کرنے کی کوشش کا الزام لگایا ہے۔

ایرانی عدلیہ نے اعلان کیا ہے کہ تشدد میں ملوث افراد پر ‘محاربہ’ یعنی ‘خدا کے خلاف جنگ’ کا مقدمہ چلایا جائے گا، جس کی سزا موت ہے۔ پولیس نے خاندانوں کو خبردار کیا ہے کہ اجتماعات میں مسلح گروہوں کی موجودگی کے دعوے کیے جا رہے ہیں اور دہشت گردوں کے خلاف کارروائی میں کوئی نرمی نہیں برتی جائے گی۔