واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے اعلان کیا ہے کہ امریکا ایران میں مظاہرین کی مدد کے لیے تیار ہے۔ ان کا کہنا تھا کہ ایران آزادی کی جانب دیکھ رہا ہے، جو پہلے کبھی نہیں ہوا۔ ٹرمپ نے سوشل میڈیا پر پیغام دیا کہ اگر ایران میں لوگوں کو قتل کیا گیا تو امریکا مداخلت کرے گا، تاہم اس کا مطلب فوجی مداخلت نہیں ہوگا۔

ٹرمپ نے مزید کہا کہ ایران کی صورتِ حال پر نظر ہے، جہاں کچھ شہروں میں لوگ قابض ہیں۔ ایرانی حکومت نے عوام کے ساتھ بُرا سلوک کیا اور اب وہ اپنے کیے کی سزا بھگت رہے ہیں۔

یاد رہے کہ ایران میں پُرتشدد مظاہرے 13 ویں روز بھی جاری ہیں، جن میں 15 سکیورٹی اہلکاروں سمیت 65 افراد ہلاک ہو چکے ہیں۔ ایرانی میڈیا کے مطابق، تہران کے نزدیک ایک قصبے سے 100 مسلح فسادی گرفتار کیے گئے جبکہ ڈھائی ہزار سے زائد افراد کو حراست میں لیا گیا ہے۔ ملک بھر میں انٹرنیٹ سروس مسلسل تیسرے روز بند ہے۔