تہران: (رائیٹ ناوٴ نیوز) ایران میں جاری مظاہروں کے دوران کم از کم 50 مظاہرین اور 15 سیکیورٹی اہلکار ہلاک ہو چکے ہیں۔ سپریم لیڈر آیت اللہ علی خامنہ‌اِی نے پاسداران انقلاب کو مظاہرین پر کنٹرول کرنے کی ذمہ داری سونپ دی ہے۔

یہ احتجاج دو ہفتے قبل تہران کے گرینڈ بازار میں کرنسی بحران کے خلاف تاجر ہڑتال سے شروع ہوا اور اب ملک کے 31 صوبوں تک پھیل چکا ہے۔ مظاہرین نے سپریم لیڈر کے احکامات کو نظرانداز کرتے ہوئے بڑے شہروں میں ‘مرگ بر دیکتاتور’ کے نعرے لگائے۔

سرکاری ذرائع کے مطابق پاسداران انقلاب کو مظاہرین کے خلاف کریک ڈاؤن اور سیکیورٹی کے مکمل کنٹرول کی ذمہ داری دے دی گئی ہے۔ حکام نے گرفتاریوں میں اضافہ اور براہ راست فائرنگ کا استعمال کیا ہے۔

امریکی صدر ڈونلڈ ٹرمپ نے ایران کو مظاہرین پر تشدد بند کرنے کی دھمکی دی ہے، جبکہ ایرانی فوج نے امریکی اور اسرائیلی اقدامات کو بے امنی کا ذمہ دار قرار دیا ہے۔