واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے روسی صدر ولادیمیر پوتن کو گرفتار کرنے کی ضرورت کو غیر ضروری قراردے دیا۔ انہوں نے یہ بات تیل اور گیس کمپنیوں کے ایگزیکٹوز سے ملاقات کے دوران کہی۔

صحافی نے یوکرینی صدر ولودیمیر زیلنسکی کے وینزویلا میں امریکی کارروائی کے بعد کے ردعمل کا حوالہ دیا، جس میں زیلنسکی نے کہا تھا کہ اگر آمرانہ نظام سے اسی طرح نمٹا جاتا ہے تو امریکا جانتا ہے کہ آگے کیا کرنا ہے۔ اس پر صحافی نے ٹرمپ سے سوال کیا کہ آیا وہ کبھی پوتن کی گرفتاری کا حکم دیں گے۔

صدر ٹرمپ نے کہا کہ انہیں ایسا ضروری نہیں لگتا اور ان کے بقول ان کے پوتن کے ساتھ ہمیشہ اچھے تعلقات رہے ہیں، تاہم وہ موجودہ صورتحال پر مایوس ہیں۔ ٹرمپ نے دعویٰ کیا کہ گزشتہ ماہ جنگ میں 31,000 افراد ہلاک ہوئے، جن میں بڑی تعداد روسی فوجیوں کی تھی، جبکہ روسی معیشت دباؤ کا شکار ہے۔

ٹرمپ نے کہا کہ انہیں یقین ہے کہ معاملہ بالآخر طے پا جائے گا اور وہ چاہتے تھے کہ یہ عمل پہلے مکمل ہو جاتا۔

واضح رہے کہ 3 جنوری کو امریکی فوج کے خصوصی یونٹ ڈیلٹا فورس نے وینزویلا کے صدر نکولس مادورو کو گرفتار کر کے ملک سے باہر منتقل کیا تھا، جہاں انہیں نیویارک لے جایا گیا۔ بعد ازاں صدر ٹرمپ نے کہا تھا کہ امریکا وینزویلا میں اقتدار کی محفوظ منتقلی تک حکمرانی کرے گا۔ 5 جنوری کو ٹرمپ نے وینزویلا کی قائم مقام صدر ڈیلسی روڈریگز سے امریکا کو ملکی وسائل تک مکمل رسائی دینے کا مطالبہ بھی کیا تھا۔