سان فرانسسکو: (رائیٹ ناوٴ نیوز) سوشل میڈیا پلیٹ فارم ایکس نے ایرانی پرچم کے ایموجی میں تبدیلی کرتے ہوئے موجودہ سرکاری نشان کے بجائے تاریخی ‘شیر و سورج’ کی علامت شامل کر دی ہے۔ یہ تبدیلی 9 اور 10 جنوری 2026 کے دوران مرحلہ وار طور پر ویب ورژن پر نافذ کی گئی۔

ایکس انتظامیہ کے مطابق یہ تبدیلی پلیٹ فارم کے ایموجی ڈیزائن سسٹم کے تحت کی گئی ہے اور صرف ایکس پر نظر آنے والے ایموجیز تک محدود ہے۔ ایکس کے ہیڈ آف پروڈکٹ نیکیتا بیئر نے اس تبدیلی کا عندیہ دیا تھا، جس کے بعد سے صارفین اور ایرانی اکاؤنٹس پر نیا ایموجی دیکھا گیا۔

ایران کے موجودہ قومی جھنڈے میں 1979 کے انقلاب کے بعد بنیادی تبدیلی یہ کی گئی تھی کہ درمیان سے صدیوں پرانا شیر و خورشید کا نشان ختم کر دیا گیا اور اس کی جگہ لفظ “اللہ” پر مشتمل ایک نیا مرکزی نشان شامل کیا گیا، جو چار ہلال اور ایک تلوار کی خطاطی سے مل کر کلمۂ توحید کی علامتی شکل پیش کرتا ہے۔ اس کے ساتھ جھنڈے کی سبز اور سرخ پٹیوں کے کناروں پر سفید رنگ میں “اللہ اکبر” کو کوفی رسم الخط میں 22 مرتبہ تحریر کیا گیا، جو ایرانی کیلنڈر کے مطابق 22 بہمن یعنی انقلاب کی کامیابی کے دن کی یاد دلاتا ہے۔

شیر و سورج کا نشان ایران میں 1979 کے انقلاب سے قبل صدیوں تک قومی علامت کے طور پر استعمال ہوتا رہا ہے۔ اب یہ حکومت مخالف اور شاہی نظام کے حامی گروہوں سے منسلک سمجھا جاتا ہے۔ یہ تبدیلی ایران میں معاشی مشکلات کے باعث جاری احتجاجی مظاہروں کے دوران سامنے آئی ہے۔

سفارتی پروٹوکول کے مطابق قومی پرچم اور ریاستی علامات کا تعین صرف خودمختار ریاستیں کرتی ہیں۔ اگرچہ نجی پلیٹ فارمز کو ایموجی ڈیزائن میں تبدیلی کا اختیار حاصل ہے، تاہم اس نوعیت کے اقدامات سفارتی حلقوں میں علامتی مداخلت تصور کیے جاتے ہیں۔

یہ تبدیلی صرف ایکس کے ایموجی ڈیزائن تک محدود ہے، جبکہ دیگر پلیٹ فارمز جیسے ایپل اور گوگل اب بھی ایران کے موجودہ سرکاری پرچم کا ایموجی استعمال کر رہے ہیں۔