ٹیکساس: (رائیٹ ناوٴ نیوز) ایلون مسک کی کمپنی ایکس نے امریکی میوزک کمپنیوں کے خلاف ٹیکساس کی وفاقی عدالت میں مقدمہ دائر کیا ہے، جس میں سونی میوزک، یونیورسل میوزک، وارنر چیپل اور نیشنل میوزک پبلشرز ایسوسی ایشن کو نامزد کیا گیا ہے۔ کمپنی کا دعویٰ ہے کہ ان اداروں نے اجتماعی دباؤ اور سازباز کے ذریعے ایکس کو مہنگے میوزک لائسنس خریدنے پر مجبور کیا۔

ایکس کے مطابق، میوزک پبلشرز کی نمائندہ تنظیم کے ذریعے یہ ادارے امریکی کاپی رائٹڈ میوزک کے 90 فیصد سے زائد حصے پر قابض ہیں اور ان کی اجتماعی طاقت کو استعمال کرکے ایکس پر دباؤ ڈالا گیا کہ وہ مہنگے اور غیر منصفانہ معاہدے قبول کرے۔

مقدمے کے مطابق، میوزک کمپنیوں نے ایکس پر دباؤ بڑھانے کے لیے ہر ہفتے بڑی تعداد میں کاپی رائٹ شکایات بھیجیں، جس کے نتیجے میں ہزاروں پوسٹس ہٹائی گئیں اور پچاس ہزار سے زیادہ صارفین کے اکاؤنٹس بند کیے گئے۔

ایکس کا کہنا ہے کہ ان اقدامات نے پلیٹ فارم کے صارفین کی تعداد کم کر دی اور اشتہارات کی آمدن کو نقصان پہنچایا۔ کمپنی عدالت سے منصفانہ میوزک لائسنسنگ نظام اور مالی نقصان کے ازالے کا مطالبہ کر رہی ہے۔