کوپن ہیگن: (رائیٹ ناوٴ نیوز) ڈنمارک کی پارلیمنٹ کے رکن اور دفاعی کمیٹی کے چیئرمین راسمُس جارلوف نے کہا ہے کہ اگر امریکہ نے گرین لینڈ پر حملہ کیا تو ڈنمارک کو اپنا دفاع کرنا پڑے گا۔ انہوں نے تسلیم کیا کہ ڈنمارک کی فوج امریکہ کو روکنے کی صلاحیت نہیں رکھتی لیکن ایسے کسی بھی حملے کو ناقابلِ قبول قرار دیا۔

راسمُس جارلوف نے بھارتی چینل کو انٹرویو میں کہا کہ فوجی حملہ دو نیٹو ممالک کے درمیان جنگ جیسی صورتحال پیدا کر سکتا ہے جو تباہ کن ہوگی۔ انہوں نے کہا کہ گرین لینڈ پر حملے کے لیے نہ کوئی خطرہ موجود ہے، نہ کوئی دشمنی اور نہ ہی صدر ڈونلڈ ٹرمپ کے پاس ایسا کرنے کا جواز ہے۔

انہوں نے بتایا کہ دونوں ممالک کے درمیان ایک دفاعی معاہدہ موجود ہے، جس کے تحت امریکہ کو وہاں کان کنی سمیت دیگر سرگرمیوں کی اجازت حاصل ہے۔

ڈنمارک کی وزیرِ اعظم میٹے فریڈرکسن نے خبردار کیا ہے کہ اگر امریکہ نے گرین لینڈ پر قبضے کے لیے مسلح کارروائی کی تو یہ نیٹو کے خاتمے کا سبب بن سکتا ہے۔

صدر ٹرمپ نے 2019 میں گرین لینڈ خریدنے کی پیشکش کی تھی، جسے انکار کر دیا گیا تھا۔ 2024 کے انتخابات کے بعد انہوں نے پیشکش دوبارہ دہرائی، جو دوبارہ مسترد ہوگئی۔