اسلام آباد: (رائیٹ ناوٴ نیوز) نجکاری کمیشن کے بورڈ نے ہاؤس بلڈنگ فنانس کمپنی لمیٹڈ، نیویارک میں واقع روزویلٹ ہوٹل، اسلام آباد انٹرنیشنل ایئرپورٹ اور بجلی کی تقسیم کار کمپنیوں سے متعلق اہم فیصلے کیے ہیں۔ یہ فیصلے نجکاری کمیشن کے 247ویں اجلاس میں کیے گئے، جس کی صدارت وزیراعظم کے مشیر برائے نجکاری اور چیئرمین نجکاری کمیشن محمد علی نے کی۔

اجلاس میں بورڈ نے ہاؤس بلڈنگ فنانس کمپنی لمیٹڈ میں 51 فیصد حصص کی جاری نیلامی ختم کرنے کی سفارش کی۔ یہ فیصلہ اس وقت کیا گیا جب پاکستان مارگیج ری فنانس کمپنی لمیٹڈ واحد بولی دہندہ کے طور پر سامنے آئی اور اس نے 4.2 ارب روپے کی پیشکش کی، جو کابینہ کمیٹی برائے نجکاری کی منظور کردہ 13.55 ارب روپے کی ریفرنس قیمت سے کہیں کم تھی۔ بورڈ نے نئی مالیاتی مشیر کی تقرری کے ساتھ نجکاری کا عمل دوبارہ شروع کرنے کی ہدایت دی۔

روزویلٹ ہوٹل کے معاملے پر بورڈ نے مالیاتی مشیر کی تقرری کا موجودہ عمل منسوخ کرتے ہوئے نئی ایکسپریشن آف انٹرسٹ جاری کرنے کا فیصلہ کیا، تاکہ زیادہ مسابقتی عمل کو یقینی بنایا جا سکے۔ بورڈ کو بتایا گیا کہ قانونی اور تکنیکی جانچ کے بعد دلچسپی رکھنے والی کمپنیوں کی تعداد سات سے کم ہو کر دو رہ گئی تھی۔

نجکاری کمیشن بورڈ نے اسلام آباد انٹرنیشنل ایئرپورٹ کو نجکاری پروگرام میں شامل کرنے کی بھی سفارش کی اور تجویز دی کہ اس کے لیے رعایتی بنیادوں پر اوپن اور مسابقتی ماڈل اپنایا جائے۔ یہ فیصلہ کابینہ کمیٹی برائے بین الحکومتی تجارتی لین دین کے یکم جنوری 2026 کے فیصلے کے بعد سامنے آیا، جس میں حکومت سے حکومت ماڈل کو مسترد کر دیا گیا تھا۔

بورڈ نے نجکاری کمیشن کو اس لین دین کے لیے ایشیائی ترقیاتی بینک سے براہِ راست مذاکرات کی اجازت بھی دی، تاکہ اسے مالیاتی مشیر مقرر کیا جا سکے۔

اس کے علاوہ اجلاس میں حیدرآباد الیکٹرک سپلائی کمپنی اور سکھر الیکٹرک پاور کمپنی کی نجکاری کے لیے ٹرانزیکشن کمیٹی قائم کرنے کی منظوری دی گئی، جو مالیاتی مشیر کی جانب سے جمع کرائی گئی تجاویز کا جائزہ لے گی۔

نجکاری کمیشن بورڈ نے اس عزم کا اعادہ کیا کہ تمام نجکاری معاملات شفاف، منظم اور مسابقتی طریقہ کار کے تحت مکمل کیے جائیں گے، تاکہ قومی خزانے کے لیے زیادہ سے زیادہ مالی فوائد حاصل کیے جا سکیں۔