لاہور: (رائیٹ ناوٴ نیوز) پاکستان تحریک انصاف کی رہنما ڈاکٹر یاسمین راشد نے نو مئی کے تین مختلف مقدمات میں سنائی گئی سزاؤں کے خلاف لاہور ہائیکورٹ میں اپیلیں دائر کی ہیں۔ یاسمین راشد نے اپنے وکیل رانا مدثر عمر کے ذریعے اپیلیں دائر کرتے ہوئے دعویٰ کیا کہ ٹرائل کورٹ نے حقائق کا درست جائزہ لیے بغیر سزائیں سنائیں۔ اپیلوں میں درخواست کی گئی کہ ان سزاؤں کو کالعدم قرار دیا جائے۔

یاسمین راشد نے مؤقف اختیار کیا کہ ٹرائل کورٹ نے جلدبازی میں ٹرائل مکمل کر کے غیر قانونی طور پر سزائیں سنائیں، جو انصاف کے تقاضوں کے منافی ہیں۔ انہوں نے لاہور ہائیکورٹ سے درخواست کی کہ اپیلوں کے حتمی فیصلے تک ان کی سزاؤں کو معطل کیا جائے۔

یہ اپیلیں تھانہ گلبرگ، نصیر آباد اور ریس کورس میں درج نو مئی کے مقدمات میں دی گئی سزاؤں کے خلاف دائر کی گئی ہیں۔