اسلام آباد: (رائیٹ ناوٴ نیوز) پاکستان کے حالیہ ہاؤس ہولڈ انٹیگریٹڈ اکنامک سروے (HIES) نے پچھلے چھ سالوں میں غربت اور آمدنی کی عدم مساوات میں اضافہ ظاہر کیا ہے۔ 2019 سے 2025 کے دوران غربت میں اضافہ ہوا جبکہ آمدنی کی عدم مساوات نے امیروں اور غریبوں کے درمیان فرق کو مزید بڑھا دیا۔

2019 میں 15.9 فیصد گھرانے غذائی عدم تحفظ کا شکار تھے، جو 2025 تک بڑھ کر 24.4 فیصد ہو گیا۔ شہری علاقوں میں یہ شرح 9.2 فیصد سے بڑھ کر 29.6 فیصد ہو گئی جبکہ دیہی علاقوں میں یہ اضافہ 20 فیصد سے 26.7 فیصد رہا۔

گھرانوں کی اوسط آمدنی امریکی ڈالر میں 3.4 فیصد کم ہو کر 305 ڈالر سے 294 ڈالر فی ماہ ہو گئی ہے۔ جبکہ نچلے طبقے کی آمدنی میں 12 فیصد کمی ہوئی اور بالائی طبقے کی آمدنی میں 7 فیصد اضافہ ہوا۔

گھرانوں کی بچت میں بھی کمی آئی ہے، جو کہ 32 ڈالر سے کم ہو کر 11 ڈالر فی ماہ ہو گئی ہے۔ اس کی وجہ سے سرمایہ کاری میں بھی کمی آئی ہے اور موجودہ کھاتے کا خسارہ بڑھتا جا رہا ہے۔

صحت اور تعلیم پر اخراجات میں 19 فیصد کمی آئی ہے، جو 7.2 فیصد سے کم ہو کر 5.8 فیصد ہو گئی ہے۔ اس کے بر عکس، ضروریات زندگی پر خرچ 66.6 فیصد سے بڑھ کر 68.7 فیصد ہو گیا ہے۔

یہ اعداد و شمار پالیسی سازوں کے لیے ایک انتباہ ہیں کہ وہ بنیادی غذائی تحفظ اور تعلیم پر توجہ مرکوز کریں۔