اسلام آباد: (رائیٹ ناوٴ نیوز) پاکستان سپر لیگ کی توسیع کے لیے دو نئی ٹیموں کی نیلامی اسلام آباد میں مکمل ہوئی، جس میں حیدرآباد اور سیالکوٹ کی ٹیمیں شامل ہو گئیں۔ حیدرآباد کی ٹیم ایف کے ایس گروپ نے 1 ارب 75 کروڑ روپے میں حاصل کی، جبکہ سیالکوٹ کی ٹیم او زی ڈویلپرز نے 1 ارب 85 کروڑ روپے میں خریدی۔

پاکستان سپر لیگ کی توسیع کے لیے دو نئی ٹیموں کی نیلامی کا عمل اسلام آباد میں منعقد ہوا، جس میں ساتویں اور آٹھویں ٹیم فروخت کی گئیں۔ نیلامی کے پہلے مرحلے میں ساتویں ٹیم حیدرآباد کے لیے بولی کا آغاز 1 ارب 10 کروڑ روپے سے ہوا، جس کے بعد ایف کے ایس گروپ نے 1 ارب 75 کروڑ روپے کی سب سے بڑی بولی لگا کر یہ ٹیم حاصل کر لی۔

آٹھویں ٹیم کی نیلامی کے لیے بنیادی قیمت 1 ارب 70 کروڑ روپے مقرر کی گئی تھی۔ بولی کے سخت مقابلے کے بعد او زی ڈویلپرز نے 1 ارب 85 کروڑ روپے کی سب سے زیادہ بولی دے کر آٹھویں ٹیم حاصل کر لی، جس کا نام سیالکوٹ رکھا گیا۔ اس طرح پی ایس ایل میں دو نئے شہروں کی باضابطہ شمولیت عمل میں آ گئی۔

نیلامی کے بعد خطاب کرتے ہوئے چیئرمین پاکستان کرکٹ بورڈ محسن نقوی نے کہا کہ حیدرآباد اور سیالکوٹ کی شمولیت پی ایس ایل کے لیے ایک تاریخی لمحہ ہے۔ ان کا کہنا تھا کہ پی ایس ایل صرف ایک ٹورنامنٹ نہیں بلکہ یہ لیگ پاکستان کے عوام کے جذبات سے جڑی ہوئی ہے اور یہ پیش رفت کرکٹ سے محبت کرنے والوں کی کامیابی ہے۔

تقریب میں وفاقی وزیر اطلاعات و نشریات عطا اللہ تارڑ، وزیر مملکت برائے داخلہ طلال چوہدری، پی سی بی کے اعلیٰ حکام اور مختلف کاروباری گروپس کے نمائندے شریک تھے۔ نیلامی کے عمل میں مجموعی طور پر 9 کمپنیوں نے حصہ لیا، جن میں سے دو کامیاب بولی دہندگان نئی فرنچائزز حاصل کرنے میں کامیاب ہوئیں۔

واضح رہے کہ پی ایس ایل کی توسیع کا مقصد لیگ کو مزید مضبوط بنانا، نئے شہروں کو شامل کرنا اور پاکستان میں کرکٹ کے فروغ کے لیے سرمایہ کاری کے نئے مواقع پیدا کرنا ہے۔