اسلام آباد: (رائیٹ ناوٴ نیوز) پاکستان نے چین کے ساتھ 558 ملین ڈالر کے معاہدوں پر بات چیت کی ہے جو لیتھیم آئن بیٹری کی اسمبلنگ اور پیداوار پر مبنی ہیں۔ یہ اقدامات مقامی معدنی ذخائر کے استعمال اور درآمدی انحصار کو کم کرنے کے لیے کیے جا رہے ہیں۔

حکومت چینی کمپنیوں کے ساتھ بزنس ٹو بزنس معاہدوں کے ذریعے مقامی معدنی ذخائر کا استعمال کرتے ہوئے بیٹری کی مقامی پیداوار کو فروغ دینے کا منصوبہ بنا رہی ہے۔ اس منصوبے کے تحت مرحلہ وار مقامی سپلائی منصوبہ تیار کیا گیا ہے تاکہ درآمدی انحصار کو کم کیا جا سکے، شراکت داری کے مواقع تلاش کیے جا سکیں اور مطلوبہ پالیسی اقدامات کو نافذ کیا جا سکے۔

یہ موضوع وزیر اعظم کے معاون خصوصی برائے صنعت و پیداوار ہارون اختر خان کی صدارت میں ایک اعلیٰ سطحی اجلاس میں زیر بحث آیا۔ اجلاس میں سیکریٹری صنعت و پیداوار سیف انجم، انجینئرنگ ڈویلپمنٹ بورڈ کے چیف ایگزیکٹو حماد منصور اور نجی شعبے کے نمائندے بھی شریک تھے۔

شرکاء نے نیشنل لیتھیم آئن بیٹری مینوفیکچرنگ پالیسی 2026-2031 پر پیشرفت کا جائزہ لیا۔ معاون خصوصی نے کہا کہ توانائی کی ذخیرہ اندوزی کی پالیسی کو پاکستان کے قومی توانائی سیکیورٹی فریم ورک کے ساتھ ہم آہنگ ہونا چاہیے اور نجی شعبے اور عالمی سرمایہ کاروں کی شراکت داری کی اہمیت پر زور دیا۔