اسلام آباد: (رائیٹ ناوٴ نیوز) وزیر دفاع خواجہ آصف نے کہا ہے کہ بھارت کے خلاف جنگ میں کامیابی کے بعد پاکستان کو اتنے جہازوں کے آرڈر مل رہے ہیں کہ چھ ماہ میں آئی ایم ایف کو خدا حافظ کہنے کی پوزیشن میں ہوں گے۔

خواجہ آصف نے جیو نیوز کے پروگرام کیپٹل ٹاک میں گفتگو کرتے ہوئے بتایا کہ پاکستان بھارت کے ساتھ مزید جنگوں کے لیے بھی تیار ہے اور بھارتی وزیر اعظم نریندر مودی کی عزت ملک اور بیرون ملک متاثر ہوئی ہے۔

انہوں نے مزید کہا کہ مئی 2025 کی جنگ کے بعد بھارت کا اعتماد تباہ ہوگیا ہے اور پاکستانی فوج کی اہلیت کو دنیا بھر میں تسلیم کیا جا رہا ہے۔

خواجہ آصف نے افغانستان اور ٹی ٹی پی کے حوالے سے بھی بات کی اور کہا کہ یہ بھارت کے ساتھ ملے ہوئے ہیں اور کے پی حکومت کے لوگ ٹی ٹی پی کو بھتا دیتے ہیں۔

انہوں نے عالمی سیاست پر بھی تبصرہ کرتے ہوئے کہا کہ ایران پر امریکی حملے سے پاکستان کے لیے چیلنجز پیدا ہو سکتے ہیں اور اسرائیل نے ایران کے خلاف جھوٹے الزامات لگائے تھے۔