کراچی کے مختلف علاقوں میں آوارہ کتوں کے حملے بڑھ گئے ہیں، 5 روز میں 300 کیسز رپورٹ ہوئے ہیں۔
کراچی: (رائیٹ ناوٴ نیوز)
سال نو کے ابتدائی پانچ دنوں میں انڈس اسپتال کورنگی میں سگ گزیدگی کے 300 کیسز رپورٹ ہوئے ہیں۔ مینجر ریبیز پریونشن کلینک آفتاب گوہر نے بتایا کہ کورنگی، لانڈھی، بلدیہ، حب چوکی اور گڈاپ ٹاؤن سمیت کراچی کے مختلف علاقوں میں آوارہ کتوں کے حملوں میں تشویشناک اضافہ دیکھا جا رہا ہے۔
انہوں نے مزید بتایا کہ سگ گزیدگی کے بیشتر متاثرین دو سال سے کم عمر بچے ہیں جن کے چہروں کو آوارہ کتوں نے بری طرح زخمی کر دیا جبکہ ایک واقعے میں 41 سالہ شخص کی انگلی کٹ گئی۔ تمام متاثرین کو بروقت ریبیز سے بچاؤ کی ویکسین فراہم کی گئی۔
مینجر ریبیز پریونشن کلینک نے کہا کہ ریبیز خطرناک مرض ہے جو بغیر علاج جان لیوا ثابت ہوتا ہے، اس لیے سگ گزیدگی کی صورت میں متاثرہ حصہ کو نلکے کے پانی سے دھو کر فوری ویکسین لگوائیں۔
