اسلام آباد: (رائیٹ ناوٴ نیوز) وزارت صنعت و پیداوار نے موبائل اور الیکٹرانک ڈیوائسز مینوفیکچرنگ پالیسی 2026-33 کا اعلان کیا ہے، جس کے تحت استعمال شدہ موبائل سیٹوں کی درآمد پر پابندی ہوگی۔

یہ پالیسی انجینئرنگ ڈویلپمنٹ بورڈ (EDB) اور مقامی موبائل فون مینوفیکچررز کے تعاون سے تیار کی گئی ہے، جس کا مقصد مقامی پیداوار کے ذریعے عالمی برانڈز کو متوجہ کرنا ہے، جیسا کہ بھارت، ویتنام اور بنگلہ دیش میں ہوتا ہے۔

اس پالیسی کو وزیراعظم کے معاون خصوصی برائے صنعت و پیداوار ہارون اختر خان کی زیر صدارت اعلیٰ سطحی اجلاس میں پیش کیا گیا، جس میں سیکریٹری صنعت و پیداوار سیف انجم، CEO EDB حماد منصور اور پاکستان موبائل فون مینوفیکچررز ایسوسی ایشن (PMPMA) کے نمائندوں نے شرکت کی۔

ہارون اختر خان نے کہا کہ پالیسی کا بنیادی مقصد مقامی سطح پر روزگار کے مواقع پیدا کرنا اور پاکستان کے صنعتی بنیادی ڈھانچے کو مضبوط بنانا ہے۔ انہوں نے زور دیا کہ ہائی ٹیک مینوفیکچرنگ میں بیرونی سرمایہ کاری کو فروغ دینے کے لئے مرحلہ وار لوکلائزیشن اپنائی جائے گی۔

نئی پالیسی کے تحت خصوصی توجہ کلیدی اجزاء کی مقامی تیاری پر دی جائے گی، جس میں مدر بورڈز، پی سی بی، الیکٹرانک پارٹس اور ڈسپلے کمپوننٹس شامل ہیں۔