بریڈفورڈ: (رائیٹ ناوٴ نیوز) بریڈفورڈ کی جامعہ عثمانیہ مسجد میں مردوں کی پیلیٹس کلاس کی ویڈیو سوشل میڈیا پر وائرل ہوگئی، جسے دو ملین سے زائد افراد نے دیکھا ہے۔ مسجد انتظامیہ نے بتایا کہ کلاسز میں شرکت کرنے والوں کی تعداد بڑھ رہی ہے۔

جامعہ عثمانیہ مسجد میں ہر جمعرات کو 50 سال سے زائد عمر کے مردوں کے لیے پیلیٹس کلاسز ہوتی ہیں۔ سیکریٹری محمد الیاس کے مطابق یہ کلاسیں بزرگ مردوں کی صحت اور ذہنی فلاح و بہبود بہتر بنانے کے لیے شروع کی گئی تھیں۔

محمد الیاس نے کہا کہ سوشل میڈیا پر غیر معمولی ردعمل نے انہیں حیران کر دیا۔ لوگوں نے مختلف ممالک سے رابطہ کیا کہ وہ اپنی مساجد میں ایسی سرگرمیاں کیسے شروع کر سکتے ہیں۔

کلاسز کے انسٹرکٹر زارا قیانی نے کہا کہ پیلیٹس کلاسیں لچک میں اضافہ اور ذہنی و روحانی فائدہ دیتی ہیں۔ یہ مردوں کے لیے ایک ساتھ بیٹھنے اور گفتگو کرنے کا موقع فراہم کرتی ہیں۔

مسجد انتظامیہ نے بتایا کہ شرکاء کی تعداد سات سے بڑھ کر 25 تک پہنچ گئی ہے اور کچھ کلاسوں میں داخلہ محدود کرنا پڑ رہا ہے۔ مسجد انتظامیہ خواتین کے لیے بھی ایسی سرگرمیاں شروع کرنے کا ارادہ رکھتی ہے۔