پشاور: (رائیٹ ناوٴ نیوز) خیبرپختونخوا کے وزیراعلیٰ سہیل آفریدی نے پشاور کی ترقی کا وعدہ کیا ہے تاہم انہوں نے واضح کیا کہ یہ ترقی لاہور جیسی نہیں ہوگی جہاں جلسے جلوس پر پابندیاں ہیں۔

سہیل آفریدی نے بتایا کہ وفاقی حکومت نے ضم اضلاع کے لیے 568 ارب روپے کے بقایہ جات ادا نہیں کیے، صرف 168 ارب روپے دیے گئے ہیں۔ ان کا کہنا تھا کہ ان کی حکومت کرپشن کے خلاف زیرو ٹالرنس کی پالیسی اپنائے ہوئے ہے اور بقایہ جات ملنے پر ضم اضلاع میں خرچ کیے جائیں گے۔

انہوں نے امن و امان کو بڑا چیلنج قرار دیا اور کہا کہ نقل مکانی کرنے والوں کو معاوضے صوبائی حکومت ادا کرے گی۔ آفریدی نے یہ بھی کہا کہ وفاق سے بقایہ جات ملنے پر صوبے میں سہولیات بہتر ہو سکتی ہیں۔

سہیل آفریدی نے لاہور کے دورے کے دوران غلط زبان کے استعمال پر معذرت کی اور کہا کہ یہ عمل کا ردعمل تھا۔ انہوں نے مزید کہا کہ سابقہ وزرا سے گاڑیاں واپس لی گئی ہیں اور کابینہ میں توسیع جلد متوقع ہے۔