اسلام آباد: (رائیٹ ناوٴ نیوز) مزدور انجمنوں اور سول سوسائٹی تنظیموں نے اسلام آباد کیپٹل ٹیریٹری (آئی سی ٹی) کے مقامی حکومت کے فریم ورک میں حالیہ ترامیم کو آئینی حقوق پر ‘کھلا حملہ’ قرار دیتے ہوئے مسترد کر دیا ہے۔ اسلام آباد میں مقامی حکومت کے انتخابات 15 فروری کو منعقد ہونے والے ہیں۔

تنظیموں کا کہنا ہے کہ ان ترامیم کے ذریعے حکومت نے کسانوں اور مزدوروں کے لیے مختص نشستوں پر بزنس مین اور ٹیکنوکریٹس کو بٹھانے کی اجازت دی ہے جبکہ خواتین کی نمائندگی کو 33 فیصد سے کم کر کے محض 7 فیصد کر دیا گیا ہے، جسے وہ ‘انجینئرڈ ایلیٹ کیپچر’ قرار دیتے ہیں۔

کوالیشن-38 کی جانب سے جاری پریس ریلیز میں کہا گیا ہے کہ یہ تبدیلیاں پاکستانی آئین کے آرٹیکلز 3، 25، 32 اور 38 کی کھلی خلاف ورزی کرتی ہیں اور چارٹر آف ڈیموکریسی کو پامال کرتی ہیں۔

تنظیموں نے مطالبہ کیا ہے کہ کسانوں اور مزدوروں کے لیے مختص نشستوں سے بزنس مین اور ٹیکنوکریٹس کو فوری نکالا جائے، خواتین کا کوٹہ 33 فیصد بحال کیا جائے اور مقامی حکومت کے تمام عہدوں پر براہ راست انتخابات کرائے جائیں۔