لندن: (رائیٹ ناوٴ نیوز) گرم مشروبات، جیسے کہ چائے اور کافی، اگر بہت زیادہ گرم پینے جائیں تو یہ گلے کے کینسر کے خطرے کو بڑھا سکتے ہیں۔ برطانیہ کے بائیو بینک میں کیے گئے مطالعے کے مطابق، ایسے افراد جو اپنی چائے یا کافی بہت زیادہ گرم پیتے ہیں، ان میں گلے کے سرطان کا خطرہ بڑھ جاتا ہے۔

تحقیق کے مطابق، ایسے ممالک جہاں لوگ چائے یا مشروبات ابال کر یا دھواں نکلتے ہوئے پیتے ہیں، وہاں گلے کے سرطان کی شرح زیادہ ہے۔ یو کے میں کیے گئے مطالعے میں بھی یہی نتیجہ سامنے آیا کہ زیادہ گرم مشروبات پینے سے گلے کی نالی کو نقصان پہنچتا ہے، جو وقت کے ساتھ کینسر کا سبب بن سکتا ہے۔

تحقیق میں یہ بھی بتایا گیا کہ روزانہ آٹھ یا زیادہ انتہائی گرم مشروبات پینے سے گلے کے سرطان کا خطرہ کئی گنا بڑھ جاتا ہے۔ تھرماس یا تھرمل مگ مشروب کو گھنٹوں گرم رکھتے ہیں، جس سے بھی نقصان ہو سکتا ہے۔ محققین کے مطابق، مشروب کو 58 ڈگری سینٹی گریڈ پر پینا محفوظ رہتا ہے۔

احتیاطی تدابیر کے طور پر، مشروب کو تھوڑا ٹھنڈا ہونے دیں، چمچ سے ہلائیں یا ڈھکن کھول کر بخارات جانے دیں، اور ٹھنڈا پانی یا دودھ ملا کر درجہ حرارت کم کریں۔ یہ عادات گلے کے نرم ٹشوز کو محفوظ رکھ سکتی ہیں۔