اسلام آباد: (رائیٹ ناوٴ نیوز) پاکستان میں سائبر کرائم کے بڑھتے ہوئے واقعات کے پیش نظر نیشنل سائبر کرائم انوسٹی گیشن ایجنسی (این سی سی آئی اے) کی ازسرنو تشکیل کی جا رہی ہے، جس میں تکنیکی ماہرین کی شمولیت کا مطالبہ بڑھتا جا رہا ہے۔

ملک میں سائبر کرائم کی روک تھام کے لیے این سی سی آئی اے کا قیام عمل میں آیا تھا، تاہم ادارے کی کارکردگی میں تکنیکی ماہرین کی کمی کے باعث مسائل درپیش ہیں۔ وفاقی حکومت نے اب تک سینکڑوں مقدمات قائم کیے ہیں، مگر کارروائیوں میں تاخیر اور کرپشن کی وجہ سے ادارے کی ساکھ متاثر ہوئی ہے۔

پاکستان سائبر کرائم کے متاثرین کی شکایات پر کاروائی میں ناکامی کی بڑی وجہ تکنیکی ماہرین کی کمی ہے۔ تکنیکی ماہرین کی غیر موجودگی میں ڈیجیٹل فارنسک سائنس کو نظر انداز کیا گیا، جس سے متاثرین کو انصاف دلانے کے عمل میں مشکلات کا سامنا کرنا پڑا۔

معاملے کی سنگینی کا اندازہ اس بات سے لگایا جا سکتا ہے کہ پاکستان سائبر کرائم کے واقعات میں عالمی سطح پر ٹاپ فائیو ممالک میں شامل ہو چکا ہے۔ یہ صورتحال مزید تکنیکی ماہرین کی ضرورت کو اجاگر کرتی ہے، تاکہ ڈیجیٹل فارنسک سائنس کو بہتر انداز میں استعمال کیا جا سکے۔