اسلام آباد: (رائیٹ ناوٴ نیوز) اسلام آباد ہائیکورٹ کے جج جسٹس محمد آصف کے خلاف سپریم جوڈیشل کونسل میں شکایت دائر کی گئی ہے۔ یہ شکایت کرنل (ر) انعام الرحیم ایڈووکیٹ نے دائر کی ہے۔

شکایت میں الزام ہے کہ جسٹس آصف کے بیٹے کی گاڑی سے حادثے میں دو خواتین جاں بحق ہوئیں اور جسٹس آصف نے اثر و رسوخ استعمال کرتے ہوئے ریاستی مشینری کے ذریعے ورثاء پر دباؤ ڈالا۔

شکایت میں مزید کہا گیا ہے کہ جاں بحق خواتین کے ورثاء کے بیانات خفیہ طور پر ریکارڈ کیے گئے اور ملزم کو ضمانت دی گئی، جبکہ جسٹس آصف نے متاثرین کے گھر ہمدردی کے بجائے سرکاری افسران کے دباؤ پر انحصار کیا۔

شکایت میں مطالبہ کیا گیا ہے کہ جسٹس محمد آصف کو ضابطہ اخلاق کی خلاف ورزی کے باعث انکوائری کرتے ہوئے عہدے سے برطرف کیا جائے۔