لاہور: (رائیٹ ناوٴ نیوز)

سینٹرل ریجن میں شدید دھند کے باعث موٹرویز کے مختلف سیکشنز کو ٹریفک کے لیے بند کر دیا گیا ہے۔ موٹروے ایم۔2 لاہور سے کوٹ مومن، ایم۔3 فیض پور سے درخانہ، اور ایم۔4 پنڈی بھٹیاں سے خانیوال تک بند کر دی گئی ہیں۔ لاہور۔سیالکوٹ موٹروے ایم۔11 بھی متاثر ہے۔

ترجمان موٹروے پولیس نے بتایا ہے کہ موٹرویز کی بندش کا مقصد عوام کی جان و مال کا تحفظ یقینی بنانا ہے۔ قومی شاہراہ پر لاہور، پتوکی، اوکاڑہ، اور ساہیوال میں بھی حدِ نگاہ متاثر ہو رہی ہے۔

بعض مقامات پر قومی شاہراہ پر حدِ نگاہ 0 سے 100 میٹر تک ریکارڈ کی گئی ہے۔ موٹروے پولیس نے شہریوں سے دن کے اوقات میں سفر کرنے کی اپیل کی ہے اور دھند میں محفوظ سفری اوقات صبح 10 بجے سے شام 6 بجے تک بتائے ہیں۔

ڈرائیور حضرات کو ہدایت کی گئی ہے کہ فوگ لائٹس کا استعمال کریں، غیر ضروری سفر سے اجتناب کریں، تیز رفتاری نہ کریں اور آگے والی گاڑی سے مناسب فاصلہ برقرار رکھیں۔ رہنمائی کے لیے موٹروے پولیس کی ہیلپ لائن 130 پر رابطہ کیا جا سکتا ہے۔