کراچی: (رائیٹ ناوٴ نیوز) گورنر سندھ کامران ٹیسوری نے کہا ہے کہ پی ٹی آئی کو پاکستان مخالف بیانیہ بنا کر سیاست نہیں کرنے دیں گے۔ انہوں نے ایم کیو ایم کے رہنماؤں کے ہمراہ پریس کانفرنس میں کہا کہ پی ٹی آئی کا حالیہ بیانیہ دہشت گردی کے زمرے میں آتا ہے اور برطانیہ میں پاکستان کے خلاف کی گئی باتیں تشویشناک ہیں۔

گورنر سندھ نے اوورسیز پاکستانی والدین کو اپنے بچوں کی سرگرمیوں پر نظر رکھنے کی تاکید کی اور کہا کہ پی ٹی آئی کا بیانیہ دفن ہوچکا ہے، اب یہ اوورسیز پاکستانیوں کو ورغلا رہے ہیں۔ انہوں نے مزید کہا کہ پی ٹی آئی کا نفرت انگیز بیانیہ زیادہ دیر نہیں چلے گا اور کارکنوں کو بانی سے لاتعلقی کا اظہار کرنا چاہیے۔

ایم کیو ایم پاکستان کے چیئرمین خالد مقبول صدیقی نے کہا کہ پی ٹی آئی کو شخصیت سے بالاتر ہو کر وطن کے لیے کھڑا ہونے کی ضرورت ہے۔ انہوں نے سندھ حکومت پر کراچی کے لیے مختص فنڈز کی عدم فراہمی کا الزام لگایا اور وفاقی حکومت سے مدد مانگی۔