لاہور: (رائیٹ ناوٴ نیوز) پاکستان کرکٹ بورڈ نے اعلان کیا ہے کہ پی ایس ایل کے دو نئے فرنچائزز کی فروخت کے لیے 10 بولی دہندگان کو تکنیکی جائزے کے بعد شارٹ لسٹ کیا گیا ہے۔

یہ نیلامی 8 جنوری کو اسلام آباد میں ہوگی، جہاں 12 تجاویز موصول ہونے کے بعد امریکہ، آسٹریلیا، کینیڈا، متحدہ عرب امارات اور پاکستان کے سرمایہ کاروں نے دلچسپی کا اظہار کیا تھا۔

پی سی بی کے بیان کے مطابق، بولی کمیٹی نے گزشتہ تین دنوں کے دوران دنیا بھر سے موصول ہونے والی 12 تجاویز کا جائزہ لیا اور 10 بولی دہندگان کو تکنیکی معیار کے مطابق اہل قرار دیا گیا۔

اب یہ 10 اہل بولی دہندگان 8 جنوری 2026 کو جناح کنونشن سینٹر، اسلام آباد میں ہونے والی نیلامی میں شریک ہوں گے جہاں دو نئے ایچ بی ایل پی ایس ایل ٹیموں کے فرنچائز حقوق دستیاب ہوں گے۔

نیلامی میں کامیاب بولی دہندگان کے پاس اپنی فرنچائز ٹیم کے نام راولپنڈی، حیدرآباد، فیصل آباد، گلگت، مظفرآباد اور سیالکوٹ میں سے منتخب کرنے کا حق ہوگا۔

پی ایس ایل کے چیف ایگزیکٹو افسر سلمان نصیر نے کہا کہ لیگ، جو آئندہ ایڈیشن میں آٹھ ٹیموں تک پھیل جائے گی، مقامی اور بین الاقوامی سرمایہ کاروں کی مضبوط دلچسپی کی قدر کرتی ہے اور نیلامی کے منتظر ہیں۔