ڈھاکا: (رائیٹ ناوٴ نیوز) بنگلادیش کے دارالحکومت ڈھاکا میں طالب علم رہنما شریف عثمان ہادی کے قتل پر انقلاب منچہ نے شاہ باغ میں احتجاجی دھرنا دے دیا ہے۔ انقلاب منچہ کے رہنماؤں نے جمعہ کی نماز کے بعد ڈھاکا یونیورسٹی کی مرکزی مسجد سے احتجاجی جلوس نکالا جو شاہ باغ پہنچ کر دھرنے میں تبدیل ہو گیا۔ اس دوران علاقے میں ٹریفک معطل ہو گئی۔

انقلاب منچہ کے ممبر سیکرٹری عبداللہ الجابر نے اعلان کیا ہے کہ جب تک قاتلوں کو انصاف کے کٹہرے میں نہیں لایا جاتا دھرنا جاری رکھا جائے گا۔ انہوں نے خبردار کیا کہ ملک گیر شٹر ڈاؤن کی دھمکی بھی دی گئی ہے اگر حکومت فوری کارروائی نہیں کرتی۔

دھرنے کے دوران انقلاب منچہ نے اپنے تین نکاتی مطالبات دہرائے جن میں جلد مقدمے کا فیصلہ، غیر جانبدار تحقیقات اور مشیران کے استعفے شامل ہیں۔ شریف عثمان ہادی کو 12 دسمبر کو فائرنگ کے بعد زخمی حالت میں ہسپتال منتقل کیا گیا تھا لیکن 18 دسمبر کو سنگاپور میں دوران علاج انتقال کر گئے۔