اسلام آباد: (رائیٹ ناوٴ نیوز) تحریک تحفظ آئین پاکستان کے رہنما مصطفی نواز کھوکھر نے حکومت سے مذاکرات کے لیے کسی شرط کے نہ ہونے کی تصدیق کی ہے۔ انہوں نے کہا کہ اپوزیشن پارلیمان کی بالادستی اور قانون کی حکمرانی پر بات چیت کے لیے تیار ہے۔

مصطفی نواز کھوکھر نے کہا کہ وزیراعظم شہباز شریف کی مذاکرات کی پیشکش پر اتحادیوں سے مشاورت کی جا رہی ہے، جبکہ ملک میں سیاسی اور معاشی بحران عروج پر ہے، جمہوریت میں دروازے بند نہیں ہونے چاہئیں۔

پی ٹی آئی رہنما اسد قیصر نے کہا کہ ہم نے بغیر کسی شرط کے آئین کی بالادستی اور قانون کی حکمرانی کو تسلیم کرنے کا ایجنڈا دیا ہے اور حکومت کے ردعمل کا انتظار کریں گے۔

جے یو آئی کے سربراہ مولانا فضل الرحمان نے حکومت اور اپوزیشن کے درمیان مذاکرات کی آمادگی کو مثبت قدم قرار دیا ہے۔

شہباز شریف نے کہا کہ جائز مطالبات پر مذاکرات ہو سکتے ہیں، بلیک میلنگ نہیں چلے گی۔ اپوزیشن اتحاد تحریک تحفظ آئین پاکستان کے ترجمان نے کہا کہ پارلیمان، قانون کی بالادستی اور انسانی حقوق پر مذاکرات کے لیے تیار ہیں۔