کراچی: (رائیٹ ناوٴ نیوز) بولی ووڈ کی فلم ‘دھرندھر’ میں رحمان ڈکیت کے کردار کی مقبولیت کے بعد ان کے چھوٹے بیٹے عبدالرحیم کو بھی عوامی دلچسپی کا مرکز بنایا گیا ہے۔ عبدالرحیم نے حال ہی میں پاکستانی یوٹیوبر اسما طاہر کو انٹرویو دیتے ہوئے اپنے والد کی زندگی سے مختلف راستہ اختیار کرنے کی وضاحت کی ہے۔

عبدالرحیم نے بتایا کہ وہ کلاس 9 کے طالب علم ہیں اور انھیں باکسنگ کا شوق ہے، ان کا خواب ہے کہ وہ مستقبل میں بین الاقوامی باکسنگ کھلاڑی بنیں۔ انہوں نے کہا کہ فلم ‘دھرندھر’ میں ان کے والد کو صحیح طور پر پیش نہیں کیا گیا اور غریبوں کی مدد کا ذکر نہیں کیا گیا۔

رحمان ڈکیت، جنہیں رحمان بلوچ بھی کہا جاتا تھا، کراچی کے خطرناک گینگسٹرز میں شمار ہوتے تھے اور پولیس مقابلے میں مارے گئے تھے۔ عبدالرحیم کا کہنا ہے کہ وہ اپنے والد کے ماضی سے بالکل دور رہنا چاہتے ہیں اور تعلیم و کھیل میں مکمل طور پر مگن ہیں۔