راولپنڈی: (رائیٹ ناوٴ نیوز) عمران خان سے ملاقات کی اجازت نہ ملنے پر علیمہ خان اور ان کے حامیوں نے اڈیالہ جیل کے قریب دھرنا دے دیا۔ علیمہ خان نے کہا کہ عمران خان نے مذاکرات نہ کرنے کا پیغام دیا ہے اور جو مذاکرات کی بات کرے گا وہ پارٹی کا حصہ نہیں رہے گا۔

عمران خان سے ملاقات کا دن ہونے کے باوجود، پولیس نے راولپنڈی کے مختلف مقامات پر ناکے لگا دیے جہاں علیمہ خان، ڈاکٹر عظمیٰ اور نورین خان سمیت کارکنان کو روک دیا گیا۔

علیمہ خان نے میڈیا سے گفتگو کرتے ہوئے کہا کہ انتظامیہ آئین اور قانون کو توڑ رہی ہے، عمران خان کو قید تنہائی میں رکھا گیا ہے جس پر وہ احتجاج کر رہی ہیں۔ انہوں نے مزید کہا کہ عمران خان کے پیغام کے بعد کوئی مذاکرات کی بات کرے تو وہ پارٹی کا حصہ نہیں ہوگا۔

کارکنوں نے علیمہ خان کے ساتھ مل کر فیکٹری ناکے پر دھرنا دیا جبکہ پولیس نے ناکے پر رکاوٹیں کھڑی کر کے راستہ بند کر دیا۔ علیمہ خان نے کہا کہ عمران خان کے خلاف مینٹل ٹارچر کیا جا رہا ہے اور ان کے آئینی حقوق چھینے جا رہے ہیں۔