تہران: (رائیٹ ناوٴ نیوز) ایران کے وزیر خارجہ عباس عراقچی نے اسرائیل کی جانب سے ممکنہ حملے کا خدشہ ظاہر کیا ہے۔ انہوں نے کہا کہ ایران پر نئے حملے کے امکان کو مکمل طور پر رد نہیں کیا جا سکتا۔

عباس عراقچی نے روسی میڈیا کو انٹرویو دیتے ہوئے بتایا کہ ایران جنگ کا خیرمقدم نہیں کرتا، لیکن اگر جنگ مسلط کی گئی تو ایران دفاع کے لیے مکمل تیار ہے۔ انہوں نے مزید کہا کہ جنگ سے بچاؤ کا بہترین طریقہ یہی ہے کہ اس کے لیے مکمل تیاری رکھی جائے۔

ایرانی وزیر خارجہ نے ماضی کے جارحیت کے نقصانات کو یاد کرتے ہوئے کہا کہ اگر اسرائیل ماضی کا ناکام تجربہ دہرانا چاہتا ہے تو انہیں بہتر نتیجہ حاصل نہیں ہوگا۔

دریں اثناء، امریکی میڈیا نے رپورٹ کیا ہے کہ اسرائیل کو یقین ہے کہ ایران بیلسٹک میزائل پروگرام تیار کر رہا ہے اور اسرائیل ایران پر ممکنہ نئے حملے کے حوالے سے امریکا سے بات چیت کرنا چاہتا ہے۔

امریکی میڈیا کے مطابق، اسرائیلی وزیراعظم نیتن یاہو آئندہ ماہ امریکی صدر ڈونلڈ ٹرمپ سے ملاقات کے دوران ایران پر حملے کے معاملے پر گفتگو کر سکتے ہیں۔