اسلام آباد: (رائیٹ ناوٴ نیوز) سپریم کورٹ کے سینیئر ایڈوکیٹ توفیق آصف نے تحریک تحفظ آئین پاکستان کی کانفرنس میں کہا کہ ملک میں آئین کے تحفظ کے لیے سب متحد ہیں۔ انہوں نے کہا کہ ماضی میں آئین پر حملے کے وقت وکلا کی موثر آواز نے ڈکٹیٹر کو رخصت کیا اور ججز کو بحال کیا۔ ان کا کہنا تھا کہ پارلیمنٹ کی آواز جعلی مینڈیٹ کے ذریعے دبا دی گئی ہے۔

اسلام آباد: (رائیٹ ناوٴ نیوز) سابق وزیر اعظم شاہد خاقان عباسی نے کانفرنس سے خطاب کرتے ہوئے کہا کہ ہم جوڈیشل ایکٹیوزم کو روکنے کی کوشش کر رہے تھے۔ انہوں نے کہا کہ 27ویں آئینی ترمیم کے بعد جوڈیشری کی حیثیت نہیں رہی اور آئینی ترامیم کے بعد انصاف کی فراہمی ممکن نہیں رہی۔ ان کا کہنا تھا کہ ملکی مسائل کا واحد حل رول آف لا اور آئین کا تحفظ ہے۔

شاہد خاقان عباسی نے مزید کہا کہ جب تک ملک میں رول آف لا نہیں ہوگا، ملک ترقی نہیں کرے گا۔ انہوں نے کہا کہ ملک میں بنیادی انسانی حقوق کی عدم فراہمی ہے اور ہم نے اپنے ماضی سے کچھ نہیں سیکھا۔ ان کا کہنا تھا کہ سیاسی استحکام کے بغیر معاشی ترقی ممکن نہیں اور پاکستان کا ماڈل ہی ملک کی ترقی کے لیے کارآمد ہوگا۔