سڈنی: (رائیٹ ناوٴ نیوز) پاکستان کے معروف کرکٹر بابر اعظم نے ٹی ٹوئنٹی کرکٹ میں نیا ریکارڈ قائم کر دیا ہے۔ بگ بیش لیگ کے سڈنی سکسرز کی جانب سے کھیلتے ہوئے بابر نے سڈنی تھنڈر کے خلاف 58 رنز کی اننگز کھیل کر ٹی ٹوئنٹی انٹرنیشنل کرکٹ میں 50 یا اس سے زائد اسکورز کی تعداد 63 تک پہنچا دی، جو ویرات کوہلی کے برابر ہے۔

بابر اعظم نے یہ کارنامہ 163 اننگز میں انجام دیا جبکہ ویرات کوہلی نے 216 اننگز میں یہ سنگِ میل عبور کیا تھا۔ اس موقع پر بابر نے 42 گیندوں پر 58 رنز بنائے، جس میں 5 چوکے اور 2 چھکے شامل تھے۔

اس میچ میں بابر اعظم کی شاندار کارکردگی نے سڈنی سکسرز کے بڑے اسکور کی بنیاد رکھی۔ انہوں نے پاور پلے میں اسٹرائیک روٹیٹ کرتے ہوئے جوش فلپے کو بہتر کھیلنے کا موقع دیا اور دونوں کے درمیان شاندار سنچری پارٹنرشپ قائم ہوئی۔

بابر اعظم 18ویں اوور میں ریس ٹوپلے کی گیند پر آؤٹ ہوئے، لیکن اس وقت تک سڈنی سکسرز 198 رنز بنا چکی تھی۔ بابر کا یہ کارنامہ ان کی کرکٹ کیریئر میں ایک اور اہم سنگ میل ہے۔