پٹنہ: (رائیٹ ناوٴ نیوز) بہار کے وزیر اعلیٰ نتیش کمار کے حجاب اتارنے کے واقعے کے بعد ڈاکٹر نصرت پروین نے اپنی سرکاری ڈیوٹی ابھی تک جوائن نہیں کی۔ سول سرجن آویناش کمار سنگھ نے تصدیق کی کہ نصرت پروین کو 20 دسمبر تک سبالپور پرائمری ہیلتھ سینٹر میں رپورٹ کرنا تھا، لیکن وہ ابھی تک نہیں آئیں۔

گورنمنٹ طبی کالج کے پرنسپل محفوظ الرحمٰن نے بتایا کہ نصرت پروین کی ڈیوٹی جوائن کرنے کی آخری تاریخ بڑھا دی گئی ہے، تاہم ابھی تک ان کا کوئی فیصلہ سامنے نہیں آیا۔ پروین کے خاندان نے میڈیا کی توجہ سے بچنے کی کوشش کی ہے۔

بہار کے گورنر عارف محمد خان نے اس معاملے پر دکھ کا اظہار کیا اور کہا کہ وزیر اعلیٰ نتیش کمار خواتین کی عزت کرتے ہیں۔ جبکہ جھارکھنڈ کے وزیر صحت عرفان انصاری نے ڈاکٹر نصرت کو بہتر نوکری کی پیشکش کی ہے۔

نتیش کمار نے ایک تقریب میں ڈاکٹر نصرت کا حجاب اتار دیا تھا، جس کے بعد اس واقعے کی ویڈیو وائرل ہو گئی اور مختلف جماعتوں نے اس کی مذمت کی۔ معاملے پر وزیر اعلیٰ کے خلاف قانونی شکایت بھی درج کرائی گئی ہے۔