میکسیکو سٹی: (رائیٹ ناوٴ نیوز) میکسیکو سٹی ایئرپورٹ پر غیر معمولی صورتحال پیش آئی جب ایک پائلٹ نے تنخواہ نہ ملنے کے باعث طیارہ اڑانے سے انکار کر دیا۔

مسافر طیارے میں سوار ہو چکے تھے اور جہاز اڑان بھرنے کے لیے تیار تھا جب پائلٹ نے اچانک خود کو کاک پٹ میں بند کر لیا۔ پائلٹ نے اعلان کیا کہ جب تک عملے کو تنخواہ ادا نہیں کی جاتی، جہاز نہیں اڑایا جائے گا۔

پائلٹ کے مطابق وہ گزشتہ پانچ ماہ سے تنخواہ اور سفری الاؤنس کا منتظر تھا اور مالی مشکلات کا شکار ہونے کے باعث احتجاج پر مجبور ہوا۔

ایئرپورٹ حکام نے فوری کارروائی کرتے ہوئے سکیورٹی اہلکاروں کی مدد سے پائلٹ کو تحویل میں لے لیا اور تمام مسافروں کو بحفاظت طیارے سے اتار لیا۔

واقعے کے بعد ایئرپورٹ پر کچھ وقت کے لیے بے چینی رہی، مگر حالات معمول پر آ گئے۔ انتظامیہ واقعے کی تحقیقات کر رہی ہے اور ایئرلائن سے وضاحت طلب کی جا رہی ہے۔