فلوریڈا: (رائیٹ ناوٴ نیوز) امریکی ریاست فلوریڈا میں ایک خاتون نے ایک ہی دن میں اپنے دو سابق شوہروں کو مختلف مقامات پر فائرنگ کرکے قتل کر دیا ہے۔ پولیس نے 48 سالہ ملزمہ سوسن ایولون کو گرفتار کر لیا ہے، جس نے دوران تفتیش دونوں قتل کا اعتراف کیا ہے۔

پولیس کے مطابق سوسن نے پہلے ٹمپا میں دن دہاڑے اپنے پہلے سابق شوہر کو گولی مار کر ہلاک کیا۔ اس کے بعد وہ پچاس میل کا سفر کرکے مانٹی کاؤنٹی پہنچی، جہاں اس نے دوسرے سابق شوہر کو بھی فائرنگ کرکے قتل کر دیا۔

قانون نافذ کرنے والے اداروں کا کہنا ہے کہ ابتدائی تفتیش کے مطابق دونوں وارداتیں ممکنہ طور پر بچوں کی کفالت اور تحویل کے تنازعات کا نتیجہ تھیں۔ پولیس نے ملزمہ کو حراست میں لے کر مقدمہ درج کر لیا ہے جبکہ مزید تفتیش جاری ہے۔

حکام کا کہنا ہے کہ واقعے کے تمام پہلوؤں کا باریک بینی سے جائزہ لیا جا رہا ہے اور قانونی کارروائی قانون کے مطابق آگے بڑھائی جائے گی۔