اسلام آباد: (رائیٹ ناوٴ نیوز) مسلم لیگ ن کے سینئر رہنما اور وزیراعظم کے مشیر برائے سیاسی امور رانا ثنا اللہ نے کہا کہ سہیل آفریدی ریڈ لائن کراس کرنے کی کوشش کر رہے ہیں، جو ملک میں انارکی پیدا کر سکتا ہے۔ انہوں نے خبردار کیا کہ اگر آفریدی اسلام آباد کی طرف بڑھتے ہیں، تو قانون کے مطابق کارروائی ہوگی۔

رانا ثنا اللہ نے بتایا کہ پاکستان نے بعض مطلوب افراد کو گرفتار کر کے امریکا کے حوالے کیا، جس سے ملک کا مثبت تاثر اجاگر ہوا۔

سابق ڈی جی آئی ایس آئی فیض حمید کے حوالے سے انہوں نے کہا کہ وہ آرمی چیف بننا چاہتے تھے، جس کے باعث لانگ مارچ اور نو مئی کے واقعات پیش آئے۔ اگر ان کی شمولیت ثابت ہوئی، تو معاملہ ملٹری کورٹ میں جا سکتا ہے۔

انہوں نے مزید کہا کہ حکومت اور پی ٹی آئی کے درمیان مذاکرات کے لیے کچھ رہنما تیار ہیں، لیکن بانی تحریک انصاف کی جانب سے اجازت نہیں۔

جے یو آئی ف کے حوالے سے انہوں نے کہا کہ مولانا فضل الرحمان اپنے فیصلے خود کرتے ہیں۔ وزیراعلیٰ خیبر پختون خوا سہیل آفریدی پر تنقید کرتے ہوئے انہوں نے کہا کہ وہ آئینی اجلاسوں سے گریز کرتے ہیں اور صرف احتجاجی سیاست میں مصروف ہیں۔